Gígja S. Guðjóns
Fylltar Mexíkó kartöflur
26. september 2019

Fylltar Mexíkó kartöflur

Þessar fylltu katröflur eru guðdómlega góðar. Ég elska mexíkóskan mat eins og mörg ykkar vita. Chili, sýrður rjómi og kóríander er eitthvað sem getur ekki klikkað og gerir réttinn einstaklega ferskan og góðan. Ég hef gert nokkrar útgáfur af fylltum kartöflum og þessar slá hinum við að mínu mati.

Innihald fyrir 4:

2 sætar kartöflur (velja þær sem eru langar og ekki of breiðar)

2 kjúklingabringur (eða tilbúin kjúklingur, hægt að kaupa kjúklingastrimla)

Hálfur rauðlaukur

Hálf krukka fetaostur

Avocado

Sýrður rjómi 18% frá Gott í matinn

Kóríander

Salt og pipar

Olía

 

Aðferð:

Ofninn hitaður í 200 gráður blástur

  1. Kartöflurnar eru skornar langsum, gaffall er notaður til að stinga lítil göt og hitaþolin olía borin á kartöfluna. Kartöflurnar fara í ofninn á bökunarpappír í um klukkustund eða þar til þær eru mjúkar í gegn.
  2. Kjúklingurinn er steiktur ef þið hafið keypt hann óeldaðan.
  3. Á meðan kartöflurnar eru í ofninum er fínt að skera laukinn, og setja lauk, fetaost og smátt skorinn kjúkling saman í skál.
  4. Avocado er stappað, chilli skorið og kóríander rifinn niður.
  5. Þegar kartöflurnar eru tilbúnar er skafað innan úr þeim með skeið en passið að fara ekki of langt ofan í.
  6. Innihaldinu í kartöflunni er blandað saman við kjúklinginn, laukinn og fetaostinn og blandan sett aftur í kartöfluna, saltað og piprað eftir smekk.
  7. Á toppinn fer avocado, sýrður rjómi, chilli og kóríander.

Kartaflan finnst mér næg borin fram ein og sér. Það er ekki nauðsynlegt að hafa meðlæti með henni.

 

Njótið vel kæru lesendur, Gígja S

Viltu fylgjast með þessum bloggara?

Skráðu þig til að fá nýjustu færslurnar sendar!