Gígja S. Guðjóns
Buffaló blómkál með gráðaostasósu
21. ágúst 2018

Buffaló blómkál með gráðaostasósu

Buffaló vængir eru miklu  uppáhaldi hjá mér og þegar ég er í Ameríku þá leita ég uppi vængja staði og panta mér þá sterkustu. Fyrir stuttu uppgötvaði ég svo að það eru margir staðir sem selja buffaló blómkál og ég verð að segja að mér finnst það guðdómlega gott! Ég hef alltaf ætlað að prófa að gera þá sjálf og sló loksins til og það heppnaðist líka svona rosalega vel.

Þetta er skemmtilegur partý réttur og það er hægt að hafa tannstöngla við hliðiná og dýfa ofan í sósuna. Einnig er þetta sniðugur forréttur og ég myndi segja að uppskriftin sem ég gef ykkur sé eins og forréttur fyrir 4, eða bara aðalréttur fyrir 2 eins og við vorum með það í kvöld.

Undirbúningur 10 min

Eldun 35 min

Innihald blómkál:

1 stór blómkálshaus

1/2 bolli hveiti

1/2 bolli vatn

Salt og pipar eftir smekk

2/3 bolli buffalóvængja sósa

2 matskeiðar smjör

Gott að hafa sellerí eða gulrætur með til að dýfa í sósuna

 

Innihald sósa:

200 g 18% sýrður rjómi frá Gott í matinn

100 g gráðaostur

Safi úr hálfri sítrónu

Salt og pipar

 

Aðferð Blómkál:

Ofninn er hitaður í 220 gráður undir og yfir hita.

Í stóra skál er hveiti, vatni og salt og pipar blandað saman og blómkálsbitunum velt upp úr blöndunni.

Blómkálinu er næst raðað á ofnplötu og sett í ofninn í 20 mínútur.

Á meðan blómkálið er í ofninum þá er smjörið brætt og hot sósunni blandað saman við. Einnig líka fínt að byrja á að útbúa gráðaostasósuna.

Næst er blómkálið tekið út og penslað með sósunni og sett aftur inn í ofn í 15 mínútur þar til það hefur tekið smá lit.

Aðferð sósa:

Gráðaosturinn er skorinn smátt og honum blandað saman við sýrða rjómann. Sítrónan er kreist yfir og sósan krydduð með salti og pipar að vild.

Njótið vel kæru lesendur. Rétturinn verður heldur ekki verri með ííísköldum bjór…

Þið getið fylgst með Facebook síðunni minni fyrir nýjustu uppskriftir og www.gigjas.com

Viltu fylgjast með þessum bloggara?

Skráðu þig til að fá nýjustu færslurnar sendar!