Erna Sverrisdóttir
Tættur grísabógur í litlum hamborgarabrauðum og eplakaka með berjum og kökumylsnu
03. nóvember 2016

Tættur grísabógur í litlum hamborgarabrauðum og eplakaka með berjum og kökumylsnu

Tætt, úfið og hægeldað svínakjöt er í tísku. Svo auðvitað verð ég að koma með mína útgáfu. Hér er það reyndar samruni kjöts og hrásalats. Og úr verður eitthvað hrikalega gott. Ég held reyndar að hrásalat sé næsta stóra málið eða kannski er sú tíð liðin. Það er líka fínt að nota tilbúin hamborgarabrauð eða tortillakökur í staðinn fyrir smáu heimagerðu hamborgarabrauðin sem hér standa til boða. Ekkert að því að stytta sér stundum leið og tíma. Hins vegar er gott og gaman að dunda sér í eldhúsinu ef svo ber undir. Eftir svínakjöt sem rífur aðeins í og hrásalat sem í sætleika sínum temprar brunann er gott að fá sér ferska og heita eplaköku með köldum og léttum rjóma.

Tættur grísabógur í litlum hamborgarabrauðum með vínberjahrásalati

(fyrir 6-8 eða fleiri á hlaðborði)

 

Kryddlögur:

1 ½ dl púðursykur

1 msk kakó

1 tsk rauðar piparflögur

1 tsk kanill

1 tsk reykt paprika

1 ½  tsk salt

1 tsk sinnepsduft

1 ½ dl tómatsósa

4 msk ólívuolía

 

Grísabógur:

rúmlega 2 kg grísabógur

1 gulrót, skorin í bita

2 laukar, skornir í báta

6 hvítlauksrif, óafhýdd

5 dl eplasíder

2 ½ dl vatn

 

1.Stillið ofninn á 150°.

2. Hrærið saman fyrstu níu hráefnunum sem eiga að fara  í kryddlöginn. Makið honum síðan yfir allt kjötið. Leggið grísabóginn í ofnskúffu eða í pott með loki, sem má fara í ofn. Raðið gulrótarbitum, laukbátum og hvítlauk meðfram. Hellið eplasíder og vatni í ofnskúffuna. Setjið í ofninn og eldið í 2 tíma. Hyljið þá með álpappír eða setjið lok á og eldið áfram í 2 ½ tíma.

3. Takið kjötið út úr ofninum og leyfið því að standa í 20 mínútur. Fleygið grænmetinu. Hrærið upp í soðinu. Tætið kjötið niður með tveimur göfflum og setjið í soðið. Berið fram með hamborgarabrauðum, litlum eða stórum, eða tortillakökum og hrásalati.

 

Litlir hamborgarar
(32 stk.)

 

2 dl vatn

2 dl mjólk

3  tsk þurrger

sykur a hnífsoddi

2 tsk salt

120 g smjör, við stofuhita og skorið í smáa bita

10 dl hveiti, eða eins og þurfa þykir

1 egg, pískað og til penslunar

sesamfræ, eftir smekk

 

1. Leysið gerið upp í ylvolgri mjólk og vatni. Hrærið og setjið smá sykur og salt saman við.

2. Setjið hveiti út í smátt og smátt, hnoðið og bætið smjörinu saman við. Hnoðið og bætið hveiti við eins og þurfa þykir. Látið deigið hefast á hlýjum stað í 30 mínútur.

3. Skiptið deiginu niður í 36 bita og mótið kúlu úr hverjum bita. Raðið á bökunarplötu klædda bökunarpappír. Látið hefast í 30 mínútur.

4. Stillið ofninn á 180°.

5. Penslið með eggi og sáldrið sesamfræjum yfir. Bakið í u.þ.b. 10 mínútur.

Vínberjahrásalat

2 msk eplasíderedik

1 msk Dijonsinnep

1 msk sykur

2 msk ólífuolía

1 ½ dl sýrður rjómi 18% eða 36%

sjávarsalt og svartur pipar

1 lítill grænn kálshaus  eða ½ haus af stórum, skorinn í þunna strimla

8 vorlaukar, saxaðir

5 dl græn vínber, söxuð

2 handfylli  af ferskum kóríander, saxað

 

1. Pískið fyrstu þrjú hráefnin saman. Bætið olíunni saman við smátt og smátt á meðan hrært er. Bætið sýrðum rjóma út í. Hrærið og smakkið til með salti og pipar.

2. Setjið hin hráefnin saman við og hrærið varlega saman.

 

Eplakaka með hindberjum og kökumylsnu

 

800 g epli að eigin vali, afhýdd, kjarnhreinsuð og skorin í bita

1 dl sykur

1 tsk kanill

2 dl hindber, fersk eða frosin

 

125 g smjör við stofuhita

3 ¼ dl hveiti

1 ¼ dl sykur

 

Meðlæti:

létt þeyttur rjómi, grísk jógúrt, eða þeyttur rjómi blandaður saman við uppáhalds skyrtegundina og pínu flórsykur.

 

Aðferð:

1. Stillið ofninn á 200° og olíuberið eldfast mót eða klæðið bökunarform með bökunarpappír.

2. Veltið eplabitunum upp úr kanil og 1dl af sykri og setjið ofan í formið. Sáldrið hindberjum yfir.

3. Hnoðið saman í höndunum, smjöri, sykri og hveiti þar til úr verður gróf mylsna. Dreifið yfir eplin og hindberin. Setjið í ofninn og bakið í u.þ.b. 20-30 mínútur eða þar til kakan er orðin gullin. Berið fram með meðlætinu.

Viltu fylgjast með þessum bloggara?

Skráðu þig til að fá nýjustu færslurnar sendar!