Erna Sverrisdóttir
Próteinríkar pönnukökur með tómötum, pistasíupestói og mozzarellaosti
31. janúar 2017

Próteinríkar pönnukökur með tómötum, pistasíupestói og mozzarellaosti

Ég hef áður líst áhuga mínum og tilraunastarfsemi með vöfflur og ýmiskonar álegg. Pönnukökur eru ekki undanskyldar áráttunni. Um daginn birtist þessi réttur mér, svo ljúfur og góður, litríkur og fallegur. Ég átti von á nokkrum vinkonum í hádegisverð um helgi og þær kvöddu alsælar, satt best að segja. Pönnukökurnar eru líka frábærar með rifnum osti, skinku, pepperóní og grænmeti, t.d. sveppum eða papriku. Þá er hins vegar gott að setja áleggið fyrst á, brjóta kökuna svo saman eða rúlla henni upp og hita síðan í ofni.

Próteinríkar pönnukökur með tómötum, pistasíupestói og mozzarellaosti

(fyrir 4)

 

Pönnukökudeig

( u.þ.b. 8 stk.)

 

2 dl hveiti

1/4 tsk. lyftiduft

sjávarsalt og svartur pipar, eftir smekk

3 egg

2 dl kotasæla

2 dl sýrður rjómi eða grísk jógúrt frá Gott í matinn

1 dl rifinn parmesanostur

25 g smjör, brætt

 

 

Blandið þurrefnunum saman í skál.

1. Pískið egg, kotasælu, sýrðan rjóma og parmesanost saman. Hellið saman við þurrefnin og hrærið þar til blandan er laus við kekki. Bætið smjöri saman við. Hrærið.

2. Steikið á pönnukökupönnu.

 

Pistasíupestó

50 g fersk basilíka

3 msk. pistasíur, án skelja

smá sjávarsalt og svartur pipar

2 hvítlauksrif

1 ½ dl góð ólífuolía

½ dl rifinn parmesanostur

 

Setjið fyrstu fimm hráefnin í matvinnsluvél eða blandara og maukið. Setjið í skál og hrærið parmesanosti saman við. Smakkið til með salti.

 

Álegg:

sýrður rjómi

2 box piccolotómatar, skornir í tvennt, eða önnur tegund af safaríkum tómötum

1 dós litlar mozzarella kúlur

 

Samsetning

(u.þ.b. 8 fylltar pönnukökur)

Smyrjið hverja pönnuköku með sýrðum rjóma og pistasíupestói, u.þ.b. 1 msk. af hvoru. Setjið tómata og mozzarella yfir og brjótið pönnukökuna saman. Berið fram með afganginum af pestóinu ef einhver er, góðri ólífuolíu, parmesanosti og svörtum pipar.

Viltu fylgjast með þessum bloggara?

Skráðu þig til að fá nýjustu færslurnar sendar!