Erna Sverrisdóttir
Mexíkóskur grænmetisréttur í stökkri tortillu með ferskri límónusósu
29. janúar 2016

Mexíkóskur grænmetisréttur í stökkri tortillu með ferskri límónusósu

Grænmeti, baunir, trefjar. Hljómar vel í upphafi árs. Í öllu falli bergmál matarandans í janúar. Hér kemur því réttur í þessum anda. Samt með pínu auka sem einhvern veginn verður að vera með.  Í frosti og kulda. Eitthvað djúsí. Bráðinn ostur og smá rjómi.

Rétturinn er fyrst ofnbakaður og síðan settur í stökkar tortillaskálar. Hver og einn getur síðan brotið bita af skálinni og notað hann til að borða upp úr dýrðinni. Eins mætti sleppa tortillaskálinni og bera réttinn fram með nachosflögum og límónusósunni eða sýrðum rjóma eða grískri jógúrt.

Mexíkóskur grænmetisrétttur í stökkri tortillu með ferskri límónusósu

(Fyrir 4-6)

 

2 sætar kartöflur, ekki of stórar

3 dl rifinn cheddarostur

1 ¼ dl matreiðslurjómi

4 msk mjúkt smjör

sjávarsalt og svartur pipar

olía

1 rauðlaukur, fínsaxaður

1 lítil rauð paprika, skorin í litla bita

3 msk smásaxað sellerí

1 hvítlauksrif, fínsaxað

1 dós svartbaunir eða nýrnabaunir

2 msk tómatamauk

1 msk rauðvínsedik

1 tsk hunang

½ tsk cummin

½  tsk kóríander

¼  tsk chillíduft

 

Límónusósa:

1 dós sýrður rjómi eða 2 dl grísk jógúrt

1 límóna, fínrifinn börkur og safi

1 ½  tsk hunang

sjávarsalt

 

Meðlæti:

4-6 tortillur

ferskt salat eftir smekk

ferskur kóríander eftir smekk, má sleppa

 

1.     Stingið í kartöflurnar með gaffli hist og her. Setjið í örbylgjuofn í 13-15 mínútur. Eða skrælið þær, skerið í bita og sjóðið þar til þær eru orðnar meirar. Skafið innan úr kartöflunum (ef þið notið örbylgjuofn).

2.     Stappið kartöflurnar og blandið matreiðslurjóma, 2 ½ dl af osti og smjöri saman við. Smakkið til með pipar og salti. Setjið til hliðar.

3.     Stillið ofninn á 180°.

4.     Hitið olíu á pönnu og steikið rauðlauk, hvítlauk, papriku og sellerí.

5.     Skolið baunirnar og bætið þeim út á pönnuna ásamt tómatamaukinu, hunangi, ediki og kryddum. Hrærið og látið malla í u.þ.b 5 mínútur.

6.     Olíuberið eldfast mót og setjið baunamaukið í. Hyljið með sætkartöflustöppunni. Dreifið restinni af cheddarostinum yfir og bakið í 20-30 mínútur, eða þar til gullið.

7.     Spreyið eða penslið tortillakökurnar með olíu og komið þeim fyrir á öfugu muffinsformi (sjá mynd) eða setjið kökurnar ofan í skálar sem þola ofnhita. Bakið í u.þ.b. 10 mínútur.

8.     Hrærið öllu saman sem á að fara í límónusósuna, smakkið til með salti.

9.     Setjið ferskt salat ofan í skálarnar, þá baunamaukið og toppið með kóríander og límónusósu.

Viltu fylgjast með þessum bloggara?

Skráðu þig til að fá nýjustu færslurnar sendar!