Erna Sverrisdóttir
Kröftugt kjúklingachili
07. nóvember 2018

Kröftugt kjúklingachili

Kröftugt og matarmikið kjúklingachili

Kalt veður kallar á heitan og kröftugan mat. Best er að hafa hann sterkan, hlaðinn osti og kannski pínu rjóma. Hér býð ég upp á chili með kjúklingi, baunum og tvennskonar chili. Rjómaostur kemur einnig við sögu og ekki skemmir meðlætið. Þetta er verulega gott í matinn!

Kröftugt  kjúklingachili

(fyrir 4)

1 msk. ólívuolía

1 lítill laukur, saxaður

1 lítið grænt chili, fræhreinsað og fínsaxað

2 hvítlauksrif, marið

¼ tsk. cumin

¼ tsk. oregano

2 kjúklingabringur, hver skorin í þrjá bita

6 dl vatn

1½  kjúklingakraftsteningur

¼ - ½ dl niðursoðið jalapeno, saxað

1 dós niðursoðnar hvítar baunir

2 dl maísbaunir

Handfylli af fersku kóríander

2½ dl og meira ef vill, hreinn rjómaostur frá Gott í matinn

Salt og svartur pipar

Límónusafi

 

Meðlæti:

Sýrður rjómi frá Gott í matinn

Rifinn mozzarella frá Gott í matinn

Nachos, gróft mulið

Límóna, skorin í báta

Ferskt kóríander, saxað

1 vorlaukur, saxaður

 

Hitið olíu í potti og mýkið lauk og grænt chili í 5 mínútur. Bætið við hvítlauk og kryddinu og steikið áfram í 3 mínútur.

Bætið kjúklingnum, jalapenoi, vatni og kjúklingakrafti saman við. Látið suðuna koma upp. Setjið þá lok á pottinn og látið malla í 12 mínútur við vægan hita.

Takið pottinn af hellunni og veiðið kjúklinginn upp úr. Tætið hann í sundur með tveimur göfflum og setjið aftur ofan í soðið.

Látið renna af baununum og bætið þeim síðan í pottinn ásamt maísbaunum. Sjóðið við vægan hita í 10 mínútur.

Takið þá pottinn af hellunni og setjið ferskt kóríander saman við ásamt rjómaosti. Látið ostinn bráðna og smakkið til með pipar, salti, límónusafa og rjómaosti ef vill.

Berið strax fram með meðlætinu.

Viltu fylgjast með þessum bloggara?

Skráðu þig til að fá nýjustu færslurnar sendar!