Erna Sverrisdóttir
Fljótlegt, fallegt og ljúffengt pasta
15. ágúst 2017

Fljótlegt, fallegt og ljúffengt pasta

Nú er hvorki grillaður fiskur né kjöt. Vel þroskaðir litlir og sætir tómatar rötuðu á grillið mitt með ýmsu góðgæti sem seinna blandaðist mozzarellaosti, ferskri basilíku og pasta. Dýrðleg blanda. Græn, rauð og hvít. Og smá upphitun hjá fjölskyldunni áður en hún hélt á suðrænar slóðir. Verulega góður réttur. Í staðinn fyrir pasta mætti vel blanda fersku salati saman við tómata, ost og basilíku. Setja á gott súrdeigsbrauð eða borða eitt og sér.

Ferskt spagettí með grilluðum smátómötum, basilíku og mozzarellaosti

(fyrir 4)

 

400 g litlir tómatar, t.d. kirsuberja eða piccolo. Ég notaði piccolo, skornir í tvennt

3 msk. ólífuolía

3 hvítlauksrif, söxuð

rifinn börkur af 1 sítrónu

1 rautt chillí, fínsaxað

sjávarsalt og svartur pipar

2 msk. balsamikedik

500 g ferskt spagettí

2 stórar mozzarellakúlur, saxaðar

2 msk. ristaðar furuhnetur

ríflegt handfylli af basilíku, gróft söxuð

parmesanostur

 

1. Setjið tómatana á álpappir og brjótið upp á kantana.

2. Hellið ólífuolíu yfir. Saltið og piprið. Dreifið hvítlauki, chillí og sítrónuberki yfir. Grillið á háum hita í u.þ.b. 10 mínútur. Takið af grillinu og hellið balsamikedikinu yfir. Geymið.

3. Sjóðið pasta samkvæmt leiðbeiningum og blandið síðan saman við tómatana, mozzarellaostinn, furuhneturnar og basilíkuna. Saltið og piprið ef þurfa þykir. Berið strax fram með ferskum parmesanosti.

Viltu fylgjast með þessum bloggara?

Skráðu þig til að fá nýjustu færslurnar sendar!