Erna Sverrisdóttir
Brunch í skammdeginu
01. desember 2016

Brunch í skammdeginu

Hér koma tveir góðir réttir til að njóta við kertaljós í hádegi. Saðsamar kartöflupönnukökur með ríkulegu áleggi og gómsætri sósu og frábærar skonsur, sem eru ekki síðri með góðum kaffibolla eða ljúfu tei. Og sumum finnst þær bestar með ískaldri mjólk.

Kartöflupönnukökur með reyktum laxi og sinnepssósu

(10-12 stk)

 

Pönnukökudeig:

 

4 dl hveiti

1 ½ tsk lyftiduft

1 tsk sjávarsalt

4 dl hrein jógúrt

⅔ dl olía

2 egg, aðskilin

3 frekar stórar kartöflur, afhýddar og rifnar niður

½ dl ítölsk steinselja, söxuð

 

Sinnepssósa:

 

2 ½ dl sýrður rjómi 18%

4 msk rjómi

2 ½  tsk sterkt enskt sinnep, t.d. Coleman´s, meira eftir smekk

hunang, eftir smekk

sojasósa, eftir smekk

 

Álegg:

 

300-400 g reyktur lax, skorinn í þunnar sneiðar

ferskt salat

kapers

rauðlaukur

steinselja

svartur pipar

 

1. Hrærið fyrstu fimm hráefnunum saman ásamt eggjarauðunum. Stífþeytið eggjahvíturnar og blandið varlega saman við. Setjið síðan kartöflur og steinselju gætilega saman við.

2. Steikið á pönnu við meðalhita. U.þ.b. tæp ein súpuausa af deigi fyrir hverja pönnuköku. Haldið pönnukökunum volgum undir álpappír.

3. Hrærið saman sýrðum rjóma, rjóma og sinnepi. Smakkið til með sinnepi, hunangi og sojasósu.

4. Raðið álegginu ofan á hverja pönnuköku og toppið með sósu eða raðið hráefninu á bakka og hver og einn setur á eftir sínu höfði.

 

 

Súkkulaðiskonsur með rjómaosti og Nutella

(12 stk)

 

5 ½ dl hveiti

2 tsk lyftiduft

½ tsk salt

1 msk sykur

½ dl olía

1 dl mjólk

1 ½ dl hrein jógúrt eða jógúrt með karamellu og hnetubragði

100 g dökkt súkkulaði, saxað

 

1. Hrærið þurrefnum saman í skál. Pískið saman olíu, mjólk og jógúrt og hellið út í ásamt súkkulaðinu. Hrærið saman en ekki of mikið eða of lengi.

2. Setjið deigið á borðplötu. Fletjið út í u.þ.b. 2 cm þykkt deig. Skerið deigið út með glasi sem er u.þ.b. 6 cm í þvermál þar til þið hafið 12 skonsur.

3. Leggið skonsurnar á bökunarplötu klædda bökunarpappír og bakið í 12-15 mínútur við 225°. Berið fram með rjómaosti og Nutella.

Viltu fylgjast með þessum bloggara?

Skráðu þig til að fá nýjustu færslurnar sendar!